Mga konsehal nga himalta gireklamo

CEBU, Philippines - Usa  ka  kapitan sa barangay kinsa  gibati  na  og  kapungot  sa kahimalta  sa iyang  mga  konsehal,  misang-at  og  sumbong  ngadto sa mga  hingtungdang  buhatan  sa kagamhanan sa tinguha  sa  pagpitol sa  iyang  mga  badlungon  nga  opisyal.

Si  Kapitan Antero K. Caña Jr.  sa barangay Ward 4, lungsod  sa Consolacion nagkanayon  nga  nangunsulta  siya  kun  unsay  tugbang  nga  silot nga  ipahamtang  sa  iyang  mga  konsehal  nga wa  magtagad  sa ilang  katungdanan sa pagtambong  sa sesyon  makaduha  matag  buwan.

Ang iyang  sumbong iyang  gipadangat  ngadto  sa buhatan    sa Ombudsman, Commission on Elections  ug  sa Department of Interior and Local  Government (DILG).

Sa maong  sumbong  gipaila  niini  ang  mga  konsehal  ug  ang  gidaghanon  usab  sa ilang  palta  sa sesyon gikan  sa Enero hangtud  Agosto  ning  tuiga  2013.

Sila  mao  si Sabiniano Sigue 16  ang palta sulod  sa walo ka buwan, Ernesto V. Nable, 13, sulod sa 6 ug tunga  ka buwan; Baby Jane C. Enad, 7, tulo ka  buwan ug tunga,  Kelvin  Paul T. Unabia,7 sulod  sa tulo ka buwan ug tunga , ug Roselier N. Ejercito, 7, tulo ka buwan  ug  tunga.

Matud pa  ni Caña sa pamahayag  niini  sa Banat News  nga  napugos  siya  sa pagsumbong  sa maong  mga  konsehal  tungod  kay nadelatar  ang  iyang  mga  proyekto  sa pagpatuman  tungod  sa  pagkakuwang  usahay  og  kurom  sa  konseho  sa barangay.

Hinungdan  nga  nangutana  siya  sa Provincial Director Jerome G. Gonzales  sa  DILG  kun angay  pa ba  nga  ihatag kanila ang  ilang  mga  benepisyo sama  sa  mga  leave credits, honoraria, bonus  ug uban pa.

Samtang  sa sumbong  niya  ngadto  sa Comelec, gipadangat ni Caña ngadto kang  Provincial Election Supervisor Atty Lionel Marco Remo Castillano  nga  napakyas  ang  iyang  barangay sa paglig-on  sa P10 mil  nga  bayranan  niini  ngadto  sa Comelec alang sa umaabot  nga  election sa barangay  gumikan  sa kanunay  nga  wala  sa sesyon  ang  tanan  niyang  mga  konsehal. (/WC) (BANAT NEWS)