Sakop sa cabando rob gang gitugotang makapiyansa

CEBU, Philippines - Gitugutan sa korte nga makapiyansa ang usa sa mga akusadong miyembro sa Cabando Robbery gang nga nag-atubang og kasong robbery with homicide sa nahitabong pagpanulis sa roving teller diha sa Robinsons Department Store niadtong 2011.

Si Judge Wilfredo Navarro sa  Regional Trial Court Branch 19 nagkanayon nga bisan pa man sa mga witnesses nga gipresentar sa prosekusyon, pakyas gihapon sila pagtumbok kang Rolien Castro nga nakigkunsabo sa mga tulisang apil sa gipangkiha.

Si Navarro mitugot kang Castro nga makabutang og piyansa nga P1 million alang sa iyang temporaryong kagawasan. Ang kasong robbery with homicide kay usa ka non-bailable offense.

Ang abogado sa suspek nga si Atty.  Rameses Villagonzalo nagkanayon nga malipayon si Castro ug ang iyang pamilya sa desisyon sa korte. Pero matod niya nga sa pagkakaron nangita pa sila og kwarta nga ipang- piyansa.

Si Castro uban ni Junjun Cabando ug kapuyo niining si Merlyn Laguitao maoy mga akusado sa maong kaso.

Ang tulo giakusahan nga sila ang responsable sa botched robbery sa roving bank teller didto sa Fuente Osmeña. Ang maong insidente nahitabo niadtong September 5, 2011 diin duha ka security guards namatay, duha ka police ang nasamdan ug tulo sa mga tulisan ang nakalas. (/EIM) (BANAT NEWS)