Na-impound nga mga motor sa TCPS wa lukata sa mga tag-iya
CEBU, Philippines - Mikabat ngadto sa 20 ka mga motorsiklo nga na-impound sa mga polis ang nagdasok karon diha sa kilid sa Talisay City Police Station nga wala na kini lukata sa mga tag-iya.
Si Superintendent Resty Santos, officer-in-charge sa Talisay City Police Station mibutyag nga ang maong mga motorsiklo sulod na sa tulo ka tuig nga napundo.
Si Santos kinsa tulo ka buwan pa lang nga milingkod isip OIC sa TCPS nagkanayon nga gimandoan sa provincial headquarters niining ulahi lang gikuhaan nila og chassis ug engine numbers ang maong mga motorsiklo ug gisumitir nila ngadto sa Land Transportation Office (LTO) aron mapangita ang mga tag-iya niini.
Sagad sa mga violations sa mga drayber niini wala makapakita og mga dokumento pagmatuod nga ilaha kini o ba kaha wala kini nila gi-carnap. Ang uban usab niini gibiyaan sa mga nagmaneho aron dili madakpan sa mga polis nga nag-checkpoint. (BANAT NEWS)
- Latest
