P1.2M koleksyon gitulis

CEBU, Philippines - Nasakiyo sa duha ka wala mailhing  tulisan ang P1.2 milyones nga kwarta nga dala sa empleyado sa usa ka bangko gikan nagkolekta niini sa usa ka farm sa sitio Tubod sa barangay Valladolid sa dakbayan sa Carcar sa alas 10:30 sa buntag sa miaging adlaw.

Ang kolektor naila nga si Marvin Dazo Cababan,36, residente sa barangay Guadalupe sa dakbayan sa Carcar.

Base sa taho sa kapolisan nga ang biktima gikan nagkolekta og kwarta sa VIFCO Farm sa sitio Tubod sa maong barangay ug padulong na unta sa gitrabahoang bangko aron kini i-deposito.

Apan pag-abot sa barangay Guadalupe gikatahong kalit kining gibabagan diha sa dalan sa duha ka wala mailhing mga lalaking armado og calibre 45 pistola ug KG9 Submachine pistol. Usa sa mga lalaki nga giingong nagsuot og helmet ang mikanaog sa motorsiklo ug mikuha sa bag  ni Cababan nga maoy gisudlan sa maong kwarta ug giapil pagdala ang yawe sa iyang motorsiklo.

Ang duha ka suspetsado daling miikyas padung sa  wa pa mahibaw-i nga direksyon dala ang 1.2 milyones ka pesos nga cash. Ang biktima igo na lang mitulod sa iyang motorsiklo padulong sa usa ka motorcycle shop sa dakbayan sa Carcar ug didto nangayo og tabang.

Si Supt. Renato Malazarte ang Deputy for Operations sa Cebu Provincial Police Office miingon nga mopahigayon sila og case conference sa maong pagpanulis ug imbitahon nila ang mga opisyales sa maong bangko sa farm diin gikolekta ang maong kwarta.

Samtang padayon pa ang hot pursuit operation nga gipahigayon sa kapolisan sa dakbayan sa Carcar aron madakpan ug mailhan ang mga responsable sa maong pagpanulis. (/EIM) (BANAT NEWS)