Drug pusher nakaipsot, apan shabu nasakmit
CEBU, Philippines - Ang operatiba sa Provincial Intelligence Branch nakasakmit og P60,000 mil nga kantidad sa illegal nga drugas sa gipahigayon nga operasyon kagahapon sa buntag sa Barangay Tangke, Talisay City.
Apan ang subject sa maong operasyon nga si Alejandro Gabison nakaikyas human kini misuot sa hagip-ot nga kabalayan sa maong lugar.
Nakuha hinuon sa mga operatiba ang usa ka dako ug duha ka medium nga pakete nga may sulod nga gidudahang drugas lakip na ang nagkadaiyang drug paraphernalia.
Dala sa operatiba ang search warrant sa kalapasan sa Section 11 sa RA9165 o Dangerous Drugs Act of 2002 nga giluwatan ni Regional Trial Court Judge Soliver Peras, Branch 10 sa Cebu City sa dihang gihimo ang maong operasyon.
Si Supt. Rodolfo Albotra, hepe sa PIB, nagkanayon nga naghitak ang drugas sa Barangay Tangke.
Gani tulo ka mga search warrant ang ilang gi-apply batok kang Gabison.
Matud ni Albotra nga maka-dispose og 15 ngadto sa 20 gramos nga shabu ang suspek matag semana. (/EIM) (BANAT NEWS)
- Latest
