Market administrator wa malisang sa hulga
CEBU, Philippines - Wala malisang si Market Administrator Raquel Arce sa hulga nga adunay nagtinguha pagpatay kaniya ug gani siya mibutyag nga andam usab siya nga mopatay kun makahigayon.
Si Arce miingon nga wala na gani siya mogamit pa sa karaan niya’ng isyu nga armas nga usa ka .45 kalibre nga pistola ug iya na kining giilisan og mas daghan pa og mga bala aron makasukol g’yud siya kun may magtinguha sa iyang kinabuhi.
Gidungog sa miaging semana nga si Arce, kinsa nagsilbi usab nga hepe sa City Hall Clearing Team, gipusil ug gipatay sa iyang pagsuroy-suroy diha sa Carbon Public Market.
Ang report nakapabalaka pag-ayo ni Mayor Michael Rama ug ubang opisyal sa City Hall. Apan nasuta nga dili kini tinuod.
Matud ni Arce nga wala siya malisang ug mopadayon siya pagpatuman sa kahapsay diha sa Carbon ug sa mga aseras sa dakbayan bisan og may hulga sa iyang kinabuhi.
Mahinumdoman nga ang kanhi Market Administrator nga si Elpidio “Jojo†dela Victoria gipusil ug gipatay usab pipila ka tuig na ang milabay, apan ang nakalahi kay si Dela Victoria wala gayud magtinil og armas. (/EIM) (BANAT NEWS)
- Latest
