90 diyas nga pagkasuspenso gipatuman na batok sa mayor sa Aloguinsan

CEBU, Philippines - Gipatuman na kagahapon sa Department of Interior and Local Government (DILG-7) ang 90 ka adlaw nga suspension order sa Sandiganbayan batok ni Aloguinsan Mayor Cynthia Moreno ug ubang mga opisyal sa lungsod sa Aloguinsan.

Kini   may  labot   sa anomalusong pagpalit og mga construction material nga wala moagi sa tukmang bidding tulo ka tuig na ang nakalabay. Si DILG-7 Regional Director Ananias Villacorta maoy misilbi   sa maong kamanduan sa Sandiganbayan ngadto  sa buhatan  ni  Moreno. Matud ni Villacorta nga niadto pa  untang nakalabay nga  adlaw migikan ang mga opisyal sa Sandiganbayan aron moanhi sa Sugbo  alang sa personal  nga  pagtunol   sa suspension order  ngadto  sa hingtungdang  mayor,   apan nakanselar ang ilang flight tungod sa bagyo.

Ang Ombudsman Visayas maoy mipasaka sa maong kaso batok nila ni Mayor Cynthia Moreno sa lungsod sa Aloguinsan.

Lakip   sa gipasakaan og kaso mao sila si  Pepito Manguilimotan, Nonela Villehas, Marilyn Flordeliza, Gertrudes Ababon, John Lim, Orven Nengasca  ug Emilia Celis.

Nag-atubang sila og kasong kalapasan sa Akta Republika 3019 kon anti Graft and Corrupt Practices Act.

Matud ni Graft investigator Edsel Ensomo nga adunay igong basehan ang reklamo  tungod sa anomalusong pag-award  ngadto  sa Diamond Interior Industries Corp.  sa maong  proyekto.  (BANAT NEWS)