Public hearing bahin sa pagpahawa sa Centcom
CEBU, Philippines - Ang mga konsehal sa dakbayan sa Sugbo maghimo og public hearing unya sa Nobiyembre 20 aron hisgutan kun angay ba gyud nga papahawaon ang militar diha sa Camp Lapulapu sa Barangay Apas.
Nauyonan nga imbitahon sa mga konsehal nga motambong sa public hearing mao ang mga representante sa AFP Central Command, CITOM, Homeowners Association sa Apas, mga opisyal sa barangay ug ang mga magpapatigayon sa maong dapit.
Wala dayon aprobahi sa mga konsehal ang gisugyot nga resolusyon ni Konsehal Gerardo Carillo nga mag-awhag sa Department of National Defense (DND) nga pabalhinon ang mga militar gikan sa Camp Lapulapu.
Ang rason ni Carillo mao nga kun mabiyaan na sa militar ang Camp Lapulapu kabuhatan na kini og karsada isip alternate road nga kaagian sa mga sakyanan aron dili na maghuot pag-ayo ang Gov. Mariano Cuenco Avenue.
Ang mga imbitahon atul sa public hearing pahatagon sa tagsa-tagsa nila ka baruganan kun pabor ba sila o supak sa sugyot ni Carillo.
Sanglit ang yuta nga napanag-iya karon sa militar nga gigamit isip kampo diha sa Barangay Apas iya man kaniadto sa probinsya, ang mga konsehal moimbitar usab og representante gikan sa Kapitolyo atol sa public hearing.
Gilantaw nga kun kaagian na sa mga pampubliko nga sakyanan ang Camp Lapulapu maiban-ibanan na gayud ang problema sa trapiko sa Banilad-Talamban Road. (BANAT NEWS)
- Latest
