Pagkabungkag sa LP Talisay di tinuod — JVR

CEBU, Philippines - Si Talisay City Mayor Johnny De los Reyes ug ang mga kaalyado niini sa Liberal Party mihimakak sa report ga nagkabuwag na ang ilang grupo karon.

Niining ulahi lang dunay mensahe sa text nga mikatap diha sa city hall nga giingong si Bise Mayor Romeo Villarante, Konsehal Val Ylanan ug Aldin Diaz ang mangulo og protest rally batok sa mayor karong Oktubre 8, 2013 atol sa ika-100 days sa mayor.

“Karong October 8 duna koy nakuha nga information mag-rally sila Vice Mayor, Hon. Ylanan, Hon. Aldin Diaz ug uban pa kabahin sa imoha pagdala sa city hall”, matud sa mensahe sa text nga nadawat sa mayor.

Dugang niini giingong ang nahisgutang plano nga rally ipasangil ngadto sa kampo sa mga Gullas nga maoy nagpasiugda. “Ila nang ipagawas nga estorya na kang Gullas nga grupo pero sila ang nagpaluyo karong October 8. A1 information ni mayor”, dugang pa sa mensahe sa text.

Base usab sa mensahe sa text nga giingong ang grupo wala makauyon sa pagpadagan ni De los Reyes ilabi na sa hiring sa mga job order.

Human makadawat sa maong mensahe ang mayor mipatawag dayon kini sa iyang partymates ug gisuta kung unsa ka tinuod ang iyang nadawat nga mensahe sa text.

Matud ni De los Reyes nga dili siya motuo nga ang bise mayor ug ang mga konsehal motraydor kaniya.

Si Villarante sa iyang bahin, mihimakak sa maong report ug nagkanayon kini nga pabiling lig-on ang ilang grupo “the thing speaks for itself and there is no falling out between the mayor and his partymates”.

Matud ni Villarante nga ang maong text message usa ka demolition job batok sa partido.

“That text message is part of a demolition job against the party. We are united and no rally will be taken. Nganong amo manang buhaton”, ni Villarante pa.

Samtang sila si Ylanan ug Diaz mikatawa kini kabahin sa maong isyu ug nagkanayon ang duha nga sayo pa kaayo nga maghisgot og politika. (BANAT NEWS)