Punta Ingaño bantayanan sa eleksyon

CEBU, Philippines - Ang barangay Punta Ingano sa dakbayan sa Lapulapu  usa sa 30 ka barangay nga higpit nga bantayan sa kapolisan sa umaabot nga piniliay karong Oktubre 28 niining tuiga.

Si Senior Superintendent Rey Lyndon Lawas, direktor sa Lapulapu City Police Office (LLCPO) nga nahinabi sa Banat News miingon nga ang barangay Punta Ingano ilang isipon nga hot spot nga dapit sa panahon sa piniliay .

Kini tungod  sa kasinatian niadtong 2010 barangay election nga  may  pinusilay  ug adunay nakalas nga kinabuhi.

Dugang pa niya nga hingpit nilang  gipangandaman  ang  paghatag og kasiguroan   sa  kinabuhi  sa  mga  molupyo sa  maong  dapit   sugod  sa higayon nga maka-file na sa ilang Certificate of Candidacy (COC) ang managkaatbang nga kandidato.

Gitataw ni Lawas nga sa ilang panagtigom uban sa election officer sa maong dakbayan   ilang  giumol ang security plan   ug  ilang kaabag ang kasundalohan nga naglakip sa Philippine Coast Guard ug Philippine Air Force nga nahimutang usab sa maong dakbayan.

Si Senior Superintendent Lawas mipasabot nga sa giumol nilang joint security control  ilang himoon ang pagdistino og PAF, PCG ug sakop sa PNP sa 29 ka barangay sa mainland ug 11 ka barangay sa isla sa Olango.

Matud pa ni Lawas nga adunay kausaban hinuon sa gidaghanon sa idestino nilang mga sakop sa panahon sa piniliay sanglit dili man mahinayon ang Sangguniang Kabataan (SK) election.

Si Lawas miingon nga lakip  sa ilang giplano  mao ang pakigtagbo sa tanang kandidato aron  sila  makighiusa  sa kahapsay ug kalinaw  sa dakbayan  sa Lapulapu. (BANAT NEWS)