1 patay 2 angol sa motorsiklo

CEBU, Philippines - Usa  ang  namatay  samtang  duha  ka  batan-on  ang  naangol  gumikan  sa kadangog  sa karsada  sa  mga  lungsod  sa Argao ug Dalaguete  sa miaging  adlaw.

Ang  namatay  giila  sa kapolisan  nga si Regino Albiso Jr., 35, taga  barangay Mompiller, Argao.

Matud  pa ni  PO2 Renato Nacaytona, desk officer  sa Argao  Police  Station   nga  gikan  si Albiso  sa barangay  Talaga  paingon  sa  barangay  Bogo  sakay  sa  iyang  motorsiklo  nga  may  plate  number GR4061.

Pag-abot niya  sa sitio  Tikoy,  sa barangay  Bogo  kalit  lang naturandos ug misaliring  ang  iyang  sakyanan gumikan  sa kadangog   busa  nalamba  siya ug  nahiagom  sa  mga  samad  ug  bun-og  ang  iyang  lawas  ug ang  iyang ulo  nga  walay helmet  nabagdok  sa sementadong karsada.

Dali  siyang  gihatud  ngadto  sa Isidro Kintanar Memorial Hospital  apan  gideklarar  nga  dead on arrival sa doktor  nga  miatiman  kaniya.

Sa laing  bahin,  duha  ka  menor  de edad  ang  nasugamak  sa mga  samad  ug  bun-og  sa lawas   sa dihang  ang   motorsiklo  nga  walay  plate  number  nga  ilang  gisakyan  nalamba usab  didto  sa   national highway sa Barangay Casay, Dalaguete  gumikan  gihapon  sa kadangog  sa karsada  niadtong Sabado  sa gabii.

Ang  mga  angol  mao sila  si Christian Zambrano, 17, molupyo  sa maong  lugar  ug  ang  iyang lumon  nga  si Claire Villahermosa, 12,   taga Barangay Cawayan.    

Gidala  sila  ngadto  sa Julio Cardinal Rosales Memorial Hospital gumikan  sa ilang  nahiagumang  mga  samad  sa lawas tungod  sila  pulos walay helmet.

Apan  si Villahermosa gidala  sa hospital  sa dakbayan  sa Sugbo  alang  sa pag-atiman  sa  mga  samad  ug  bun-og  sa lawas  niini diin  siya  padayong  giatiman  sa  mga  mananambal. (BANAT NEWS)