Dul-an 20 ka balay naugdaw sa Kamagayan
CEBU, Philippines - Gibana-banang mikabat sa 15 ngadto 20 ka mga balay ug establisamento ang naugdaw ug usa ka 3-anyos nga batang lalaki ang naangol sa nahitabong sunog kagahapon pasado alas 5:00 sa hapon diha sa sitio San Antonio, barangay Kamagayan, dakbayan sa Sugbo.
Si City Fire Marshal Fernando Vonrad Dublois mibutyag nga nadawat nila ang alarma sa sunog mga alas 5:13 sa hapon ug nakontrolar nila kini sulod sa 20 minutos.
Ang batang naangol nga nakaangkon og first degree burn sa lawas mao si Shun Dolino kinsa daling gidala ngadto sa tambalanan.
Matud ni Dublois nga ang kalayo sa sunog nagsugod kini diha sa ikaduhang andana sa Balay ni Bebeth Nuñez ug gipaubos kini sa Task Force Alpha.
Gibana-banang mikabat ngadto sa P150,000 ang danyos sa sunog ug ang kabomberohan nagpahigayon pa og imbestigasyon sa hinungdan niini.
Si Dublois midugang nga ang karsada habig sa may barangay hall wala silay problema apan sa pikas habig sa may dalan Junquera wala dayon sila makasulod tungod sa mga sakyanan diha sa parking lot diin ilaha una kining gipahawanan. (BANAT NEWS)
- Latest
