Tomas subling nanaway ni Mike

CEBU, Philippines - Si kanhi kongresista Tomas Osmeña misaway ni Mayor Michael Rama kay wala kini motug-an sa tinuod nga isyu nga wala siya did-i pagbaligya og yuta sa South Road Properties (SRP).

Matud ni Osmeña nga ang pagmugna og ordinansa pinaagi sa City Council gitumong lang aron masiguro nga dili na lang ‘sab basta-basta nga bisan kinsa na lang ang baligyaan og yuta sa mayor.

Ang City Ordinance 2332 nga gipasar sa City Council ug bisan gisupak kini ni Rama apan aksidente nga iyang napirmahan, naglatid nga kinahanglang mopahibalo sa konseho ang mayor kun makigsabot-sabot siya alang sa pagbaligya sa SRP.

Apan si Rama mihimo’g argumento nga atol sa panahon ni Osmeña kaniadto nga maoy mayor sa dakbayan wala kini makigsabot sa konseho kun makigsabot-sabot siya sa mga investors nga mopalit og yuta sa SRP.

Si Osmeña miingon nga ang tinuod nga rason ni Rama nga gusto gyud nga makabaligya og yuta sa SRP mao nga matubag ang kakuwang niini og kwarta sa dakbayan.

Matud ni Osmeña nga dili makamao mangita’g kwarta si Rama aron magamit sa pagpatuman sa iyang mga proyekto.

Gani matud ni Osmeña nga bisan og gipakunhoran sa City Council ang daku nga budget nga gisugyot ni Rama, ang iyang administrasyon dili gihapon makakolekta sa kinatibuk-ang kantidad.

Karong tuiga si Rama misugyot og P6.7 Bilyones nga budget apan P5.2 Bilyones ra ang giaprobahan sa konseho kay nalantaw na nila’ng daan nga dili makolekta ang maong kantidad nga gisugyot sa mayor.

Hangtud sa miaging Hulyo, kapin pa lang sa tulo ka Bilyon ka pesos ang nakolekta sa city treasurer’s office. (/EIM) (BANAT NEWS)