Cardinal Vidal nagpabilin sa tambalanan apan stable na

CEBU, Philippines - Wala nay angayang ikabalaka ang publiko kabahin sa panglawas ni Cebu Archbishop Emeritus Ricardo Cardinal Vidal kinsa nakasinati og mild stroke niadtong Martes sa gabii.

Sumala pa ni Cebu Archbishop Jose Palma kagahapon, nadala sa Perpetual Soccuor Hospital si Vidal human kini mabantayi sa mga kauban sa balay nga nahiwi ang baba ug lisod sabton ang gipanulti.

Si Vidal nagpuyo diha sa Sto. Niño Village sa barangay Banilad ning dakbayan. Matud pang Palma stable na ang kahimtang sa cardinal.

“No cause for panic or big worry,” matud pang Palma, dugang sa pag-ingon nga bisan sila nakakita nga nabalik na ang kalagsik sa cardinal sa uwahi nilang pagduaw sa miaging gabii.

Matud pang Palma nga nagngisi-ngisi na og balik si Vidal. Wala hinuon sila hatagi sa kompletong medical examination analysis sa kaso ni Vidal.

Apan giingong epekto kini sa gamay lang nga hanging misud kuyog sa iyang dugo padung sa iyang utok maong nag-mild stroke kini.

Wala pa matino kung pagkaon ba maoy naka-trigger niini apan matud pang Palma himili sa pagkaon ang cardinal. “Si Cardinal is one person na very careful of his food,” pasabot pa ni Palma.

Wala pa usab mahibaw-i kung kanus-a makagawas sa tambalanan ang cardinal, samtang gipasabot ni Palma nga gihimangnoan sila sa mga doktor nga dili lang una kanunayon og bisita si Vidal tungod kay kinahanglan niini og pahuway.

Gidasig hinuon ni Palma si Vidal nga dalion ang paggawas sa tambalanan ug kinahanglang molagsik kini sa dili pa ang International Eucharistic Congress (IEC) sa 2016.

Sumala pang Palma, si Vidal ang unang communicant dihang gihimo ang IEC sa Cebu niadtong 1937. Matud pa ang tubag ni Vidal bahin niini “siyembre.” (/EIM) (FREEMAN)