2-anyos namatay human madasmagan og sakyanan

CEBU, Philippines - Usa ka dos anyos nga bata ang namatay human madasmagi og sakyanan dihang kini giingong nakabuhi sa pagkupot sa iyang apohan samtang mitabok sa dalan pasado alas-6 ang takna sa milabay’ng gabii sa dalan Borromeo ning dakbayan sa Sugbu.

Ang biktima naila nga si Christianlen Gonzales 2- anyos, samtang naa pa sa tambalanan ang iyang apohan nga si Araceli Gonzales, 67- anyos pulos taga Tres de Abril, Pahina-San Nicolas ning dakbayan.

Ang drayber nga nakadasmag kanila mao si George Ecoy, 51 anyos, lumolupyo sa Barangay Tisa sa dakbayan sa Sugbo nga nagmaneho sa iyang Toyota Tamaraw nga nagdala sa plate number nga GLH 251.

Base sa pasiuna nga imbestigasyon ni SPO4 Breman Budiongan sa Traffic Division nga milabang sa dalan ang mga biktima ug wala gyud makit-i sa drayber hangtod nga nadasmagan na ang duha.

Maayong pagkalagpot sa bata  ug daling gitabang sa driver ang duha ug gidala Cebu City Medical Center.

Si Ecoy miingon nga go signal atong panahona maong mitabok siya sa dalan Colon padulong sa dalan Borromeo apan uwahi na niyang nabantayan ang duha kay milagubo na ang kilid sa iyang sakyanan ug may misinggit.

Matod pa nga ang maong bata kuyog sa iyang apohan ug sa lain pang bata kay mikaon kini sa usa ka food chain sa maong lugar, unang milabang ang ig-agaw sa bata nga 12- anyos ug misunod ang biktima.

Nakabsan sa iyang kinabuhi ang bata tungod sa kadaot nga naangkon niini sa iyang ulo.  Samtang mitahan sa Traffic Division ang drayber nga nakadasmag sa maong bata. (BANAT NEWS)