Duha ka tawo naghikog

CEBU, Philippines - Duha ka mga tawo ang naghikog sa managlahing dapit ug takna dinhi sa dakbayan sa Sugbu.

Usa ka Amparo Manano, 65, nga taga Sitio Lawis, barangay Lorega-San Miguel  ang napalgan sa iyang pag-umangkon nga si Santy Pugoy, 33, nga wa nay kinabuhi nga naghigda sa lantay nga kawayan.

Matud pa nga ang ginang adunay hikot nga cable wire sa liog samtang naghigda sa maong lantay dihang iyaha kining gisusi nga maoy iyang naandan kada buntag.

Sumala pang Pugoy ngadto sa kapolisan  nag-antos sa sakit nga diabetes, hypertension ug arthritis ang iyaan ug misuway na kini paghikog sa milabay’ng tuig apan napugngan.

Samtang laing patay ang napalgan human kini maghikog sa punoan sa nangka pasado alas-12 sa kaadlawon adlaw nga Miyerkules sa karaang DPWH compound, Salinas Drive, barangay Lahug  sa dakbayan sa Sugbo.

Ang naghikog naila nga si Edison Jumag, 25, usa ka janitor ug nagpuyo sa P.Del Rosario Ext., barangay Sambag I ning dakbayan sa Sugbo.

Si Jumag napalgan sa iyang  ig-agaw nga si Warren Jumag ug igsuon niining si Dexter Jumag nga  nagbitay sa punoan sa nangka sa nahisgutang dapit.

Matud pa nga wa mouli ang namatay mao nga ilaha kining giapas sa gitrabahoan niini sa Salinas Drive ug nabantayan ang iyang kawo ug t-shirt sa ubos sa paril duol sa punoan sa nangka.

Dihang giiwagan ni Warren nakit-an niya ang ig-agaw nga nagbitay na sa punoan sa nangka maong dali siya mitawag sa gwardiya.

Matud pa nga nabantayan nilang dunay dakong problemang gihambin ang ig-agaw apan wala gyud kini motug-an kanila. (BANAT NEWS)