2 sa 58 ka driver nga dakpunon nasikop

CEBU, Philippines - Duha niadtong 58 ka drayber nga giisyuhan og “bench warrants” sa hukmanan tungod kay wala nila bayri ang ilang multahanan, gidakop sa mga sakop sa CITOM ug traffic police group kagahapon.

Si Joy Tumulak nga maoy operations’ chief sa CITOM miila sa mga dinakpan nga sila si Randy Campaner ug Gaudioso Zuñega nga nagmaneho’g sakyanan sa Barangay Tisa.

Si Campaner  adunay pending nga P75,000 nga wala kabayri nga multahanan sa CITOM samtang si Zuñega  aduna ‘say P16,000.

Matud ni Tumulak nga mga badlongon ang maong mga drayber kay makadaghan sila madakpi sa mga traffic enforcers sulod sa nanglabay nga katuigan ug wala lang magtagad pagbayad sa ilang multa.

Si Tumulak nagkanayon nga daku-daku og pending nga multahanan si Campaner kay nadakpan siya kapin sa 156 ka higayon samtang si Zuñega nadakpan ‘sab sa makadaghan nga higayon.

Nagplano si Tumulak nga ibulgar nila ngadto sa media ang mga ngalan sa wanted nga mga drayber aron ang publiko makatabang kanila pagtudlo kun hain na kining maong mga tawo. Sukad sa miaging semana, napulo pa lang ka drayber ang nadakpan sa kinatibuk-ang 91 na ka drayber nga nalutsan og bench warrant tungod sa kapakyas nila pagtambong sa husay sa ilang kaso. (BANAT NEWS)