Mga priso sa Cordova anaa sa Lapulapu jail?

CEBU, Philippines - Ipasusi ni Lapulapu City Mayor Paz Radaza ang taho nga kapin na sa 100 ka piniriso nga gikan sa lungsod sa Cordova anaa gipahimutang sa Lapulapu City jail.

Matud pa ni Mayor Radaza ang lungsod sa Cordova ubos  sa hurisdiksiyon sa lalawigan sa Sugbo diin angayan nga ipahimutang ang mga binilanggo niini ngadto sa Cebu Provicial Detention and Rehabilitation Center o CPDRC.

Ang mga binilanggo sa dakbayan sa Lapulapu gigahinan  sa siyudad og  kuwarta ,base sa kapasidad niini  ug kinahanglang pulos  sila taga  Lapulapu.

Hinuon  bisan  dili  taga  Lapulapu  apan  nahimo  niya  ang  krimen  sa maong  lugar,  busa  makatarunganon  nga  anha  siya  prisoha.

Gumikan niini hangyoon ni Mayor Radaza ang mga huwes sa pagbalhin sa maong mga inmate nga gawas sa hurisdiksiyon sa dakbayan sa Lapulapu ngadto sa           CPDRC.

Sa gihimong pagpaupaw sa mga binilanggo sa Lapulapu City jail  sa miaging  buwan,  nadiskobrehan ni Mayor Radaza nga subra na sa 100 ka mga binilanggo  ang  sulod  sa Lapulapu City Jail.

Didto  siya  matahap  nga gikan sa lungsod sa Cordova   ang  mga   nakahuot  sa Lapulapu City Jail. (BANAT NEWS)