Salud giabsuwelto sa kaso batok sa bouncing check

CEBU, Philippines - Tungod kay walay igong ebidensya, giabswelto sa korte si boxing promoter Rex “Wakee” Salud sa kasong kriminal.

Niadtong tuig 2003, si Salud gikiha ni Almacita Paray sa kasong anti-bouncing check law sa duha  ka  kuwentada human masayri  nga  walay  pundo sa bangko ang gipailisan  niining  tseke nga balor  og  P10 ka milyon.

Luyo   sa  mga  hangyo  nga  husayon  niya  ang maong  problema  sa tseke, wala  gyud   niya  tagda  hinungdan  nga napugos  sa pagsang-at  og  kaso si Paray  ngadto sa hukmanan.

Ang maong testimonya gipamatud-an sa iyang amahan nga si Teodoro Go.

Matud ni  Go  nga niadtong Septiyembre 2003, si Salud  mitawag  kaniya  ug  mihangyo  nga  pailisan  og  cash  ang  iyang  tseke.

Unya   gisugo  ni  Go  si  Salud  ngadto  sa iyang  anak  nga  maoy  mangilis  og  tseke.

Apan matud ni  Go  nga  human  mailisi  sa  iyang  anak  ang  maong  tseke,  iya  kining  gisuta  sa bangko  apan  nakurat  kini  dihang  nasayran  nga  walay  pundong  salapi  ang  maong  tseke.

Si Salud sa iyang bahin mihimakak sa pasangil.

Matud niya ang kaso batok kaniya usa ka sayop kay wala kuno siya manghuwam  og kwarta ngadto sa   kihante.

Pero iyang giingon nga mihatag siya  og duha ka blanko nga tseke ngadto kang Paray  human  kini  pangayoa  sa naulahi. Midugang   si  Salud   nga  nakugang na lang siya sa dihang nakadawat siya  og order   nga  pasuwaton  og counter-affidavit   bahin  sa miuntol  niyang  tseke.

Si Salud  nagkanayon  usab  nga  wala siya makadawat  og bisan  unsa nga notice gikan kang Paray. Busa si Judge Monalilia Tecson of Municipal Trial Court in Cities Branch mihukom  pabor  ni Salud.

 Matud sa  huwes   nga  ang gipresentar nga ebidensya sa prosecution sa korte mao ang demand letter ug ang registry receipt  wala  makahinagbo  sa gikinahanglan   nga  makapakita  kini  og  kamatuoran  aron kalikayan  ang  pagduhaduha.

Apan  napakyas ang  kihante  sa pagpakita  og  kamatuoran   kun kinsa ang nakadawat  sa maong dokumento tungod  kay  wala  man  kini  madawat  ni   Salud.

Hinuon   bisan  og naabsuwelto   si Salud sa criminal aspect, wala siya makaikyas sa civil aspect.

Kini human, si  Tecson mimando  kaniya nga  pabayron  siya  og  P10 milyones  nga  nagrepresentar  sa  face value   sa tseke  nga  may tubo  nga  12 porsento matag  tuig.Gawas  niini, gimandoan  usab  siya  sa  pagbayad  og  P100,000  isip  attorney’s fees. (BANAT NEWS)