Wa kaantos sa hepatitis, naghikog

CEBU, Philippines - Gumikan sa sakit  nga  hepatitis, naghikog  ang  usa  ka  lalaki didto  sa BDO Borromeo Parking  Area, sa dalan  Magallanes,  sa  barangay  Ermita, dakbayan  sa Sugbo  kagahapon  sa alas 4:00  sa kaadlawon. Ang biktima naila nga si Patricio Catalan, 44, nagpuyo sa Warwick Barracks,  sa Brgy. Ermita.

Base sa imbestigasyon nga gihimo sa Homicide Section  sa Cebu City  Police  Office (CCPO) ang biktima napalgang nagbitay   nga  nagluhod  sa maong lugar.

Usa ka kuryente  ang gihigot niini sa liog ug  ang  pikas  tumoy  gigaid  sa koral  nga  puthaw  sa parking area.

Gidali   pagputol sa miresponding ERUF (Emergency Rescue Unit Foundation) ang maong hikot aron sa pagsalbar sa kinabuhi sa maong tawo.

Apan  ulahi  na  ang  tanan  kay  dugay  na  nga  nakabsan  kini sa kinabuhi.

Si PO1 Reoful Adalim nagkanayon nga usa sa gitan-aw nga hinungdan sa pagpakamatay sa biktima mao ang sakit sa atay   niini  nga gitawag  nga hepatitis.

Giingon  nga  gusto unta kining magpatambal, matud pa sa igsoon sa  biktima nga si Cresencio Catalan, apan  gumikan  kay  walay  kuwarta ang  ginikanan midangop  nalang sa paghikog.

Giingon  nga  sulogoon  lang  kini  sa  mga  negosyante  og  ukay-ukay  sa  Carbon matag  Domingo. (/WC) (BANAT NEWS)