Gipusil sa gikaaway kritikal

CEBU, Philippines - Kritikal ang kahimtang sa usa ka tawo nga gipusil sa gikaaway niining lalaki didto  sa sitio Datag, barangay Maribago sa dakbayan sa Lapulapu  sa miaging  hapon. Ang biktima mao si Julius Agosto, 28 , minyo, nga nagpuyo sa maong dapit ug ang  suspetsado  mao si Warlito Manatad, taga barangay Sabang sa isla sa Olango sa mao gihapong dakbayan.

Si SPO1 Allan Pantaleon sa homicide section sa  kapolisan sa maong dakbayan miingon nga nagkatagbo ang biktima ug suspetsado sa maong lugar ug nagkukabildo sulod lamang sa pipila ka gutlo.

Kay samtang  nag-estorya sila  kalit lang nilang nalakbitan sa paghisgot ang karaan nilang panagbikil nga maoy nakaingon sa mainiton nilang panaglalis. Dihang  nahutdan  sa maayong  katarungan, si Manatad  kalit  nga  milanit  sa  giluklok   niining  armas de fuego  nga wala matino  ang  kalibre ug gipusil  ang  biktima sa makadaghang higayon. Human  mahagba  sa yuta  ang  biktima, ang suspetsado dali nga milayas  pahilayo ug wala na kini maabti sa mga polis nga nakatubag sa maong alarma. Si SPO1 Pantaleon miingon nga ang biktima dali nga gihatod sa mga silingan  ngadto sa Mactan Doctor’s Hospital. Ang suspetsado  mag-atubang og kasong attempted murder   nga  ipasaka  batok  kaniya.  (BANAT NEWS)