Rama supak nga may MNLF sa CCJ

CEBU, Philippines - Supak si Mayor Michael Rama nga anha tanggonga sa Cebu City Jail ang duha ka sakop sa Moro National Liberation Front (MNLF) nga giingong mga ‘bomb-makers’  nga nag-atubang og kaso didto sa Mindanao. Human masayod nga adunay duha ka sakop sa MNLF nga anaa sa City Jail sa Barangay Kalunasan, si Rama miingon nga angayang ibalhin ang maong mga binilanggo.

Gihulagway sa mayor nga dili usab tukma ang gihimo sa kadagkoan sa Supreme Court nga gibutang nila ang maong mga binilanggo nga sakop sa MNLF diha sa city jail nga wala mananghid sa mayor. Gibalik-balik ni Rama nga siya maoy daku kaayo’g nahimo nga matukod ang bilanggoan diha sa Barangay Kalunasan, ilabi na ang pagpangayo og dugang pundo ni kanhi Presidente Arroyo aron pagtiwas paghuman sa city jail.

Gibutang diha sa city jail ang duha ka MNLF aron masiguro nga dili sila maluwas sa ilang kaubanan. Nag-atubang sila og kaso nga may kalabutan sa pagpamomba.

Matud ni Rama nga pakigtagboan niya ang mga sakop sa Police Coordinating Advisory Council (PCAC) aron hisgutan ang iyang tinguha nga makuha gikan sa City Jail ang duha ka MNLF. (/EIM) (BANAT NEWS)