Konsehal nanggukod og tawo gidakop

CEBU, Philippines - Usa ka konsehal sa lungsod sa Carmen ang gidakop sa kapolisan human giingong nanggukod og tawo ug nagdala’g bayoneta  diha mismo sa gawas sa Carmen Police Station sa alas 4:30 sa miaging adlaw.

Ang nasikop mao si Konsehal James Gimena Camara, 42, lumulupyo sa barangay Poblacion ug konsehal sa lungsod sa Carmen.Usa ka Domy Peralta Ruiz, 34, lumulupyo sa barangay Corte, sa lungsod sa Carmen maoy gikatahong gigukod sa konsehal.Base sa spot report nga nahipos sa Banat News gikan sa Cebu Provincial Police Office nga si Ruiz nagdagan nga mitaho sa buhatan sa kapolisan tungod kay gibaharan kini sa konsehal.Giingong dunay nasuk-an ang konsehal kang Ruiz samtang sila nag-estorya sa luyong bahin sa munisipyo ug dihadiha mikuha kini sa maong bayoneta diha sa iyang sakyanan ug gigukod siya niini hangtud sa ganghaan sa police station.

Si SPO3 Renerio Masocol kinsa diha sa atubangan sa ilang presinto daling miresponde ug misikop sa konsehal.Nakuhaan ang konsehal og usa ka bayoneta diha mismo sa iyang kamot ug karon kasamtangang gitanggong aron sa pagpasaka sa tukmang kaso batok kaniya.  Ang Banat News misuway sa pagkuha sa habig sa konsehal apan napakyas ang maong tinguha, giimbestigahan pa sa kapolisan ang hinungdan sa kasuko sa maong opisyal ngadto kang Ruiz. (/EIM) (BANAT NEWS)