Drayber natagak natabuna’g yuta

CEBU, Philippines - Patay na dihang naugkat ang lawas sa usa ka operator sa dagkong trak sa minahan diha sa sulod sa Carmen Copper Mining Corporation diha sa barangay Biga dakbayan sa Toledo kagahapon sa kaadlawon.

 Ang namatay nailhan nga si Harren Bolo Plarisan, 24, lumad nga molupyo sa barangay Magdugo.

Sa pakighinabi sa Banat News ni SPO1 Thule Gozon Tahadlangit, imbestigador sa maong aksidente mipadayag kini nga nahitabo ang aksidenti alas- 3 sa kaadlawon apan na-report sa ilang buhatan niana nang ala una sa hapon.

Sa pagsusi sa kapolisan sa dapit ilang nasayran nga nahitabo kini sulod   sa Carmen Copper Corporation.

Matod pa sa inisyal nga taho nga nakuha sa kapolisan nga ang biktima nagmaneho sa Rigid Dump Truck (RDT)-777 samtang nagpaabot sa mga waste materials nga iyang ikarga.

Ang maong trak  iya sa Galileo Equipment and Mining Company nga kontraktor sa minahan.

Matud pa nga nakabantay ang mga minero sa kalit nga pagtay-og sa yuta sa mine pit (lungag)  hinungdan nga sila nagdinaganay apan ang biktima wala dayon makanaog sa higanteng trak nga iyang gimaneho ug natabunan hinuon sa yuta.

Sa gihimong inspeksyon abli na ang trak apan wala na didto ang biktima, gituohan nga nakagawas kini sa sakyanan apan naabtan sa yuta ug natabunan didto sa ubos gibanabanang 20 ngadto sa 30 ka metros sa ubos o 100 feet.

Naugkat lang ang lawas niini nga patay na paglabay sa 17 ka oras nga kinubkobay sa mga minero.

Matud pa ni Tahadlangit nga walay makatug-an  kun unsa gyud ang nahitabo tungod kay kalit lang  ang pagdahili sa yuta.

Gisuta pa karun sa kapolisan kun si kinsa ang angayang manubag sa nahitabo apan dako ang katahap nga aksidente gyud ang nahitabo. (/EIM) (BANAT NEWS)