Way nakaila sa mipatay sa nurse

CEBU, Philippines - Patay ang usa ka registered nurse  human  kini  pusila didto  sa   sitio Caimitohan sa barangay Basak, dakbayan sa Lapulapu sa miaging  Martes sa alas 3:00  sa kaadlawon.

Giila ni PO2 Jerson Alparito sa homicide section sa kapolisan sa maong dakbayan ang biktima nga mao si Eddie Marasigan, 25, ulitawo ug nagpuyo sa sitio San Miguel sa barangay Pusok sa maong dakbayan.

Si PO2 Alparito nga nahinabi sa Banat News miingon nga nakadungog ang mga molupyo sa maong dapit og mga buto sa armas ug  human  sa pipila ka gutlo  nabati   nila ang inagulo sa tawo nga nangayo og panabang.

Dihang gisusi  sa  mga  molupyo, ilang nasuta ang biktima nga nagkamang sa kasagbutan  nga naligo sa kaugalingon niining dugo  gikan  sa iyang  mga  samad  sa bala.

Matud pa ni PO2 Alparito nga dali   kining  gidala  sa Mactan Doctors Hospital apan gideklarar  sa mga doktor sa maong tambalanan nga dead on arrival.

Si PO2 Alparito miingon nga gipalawoman pa nila ang  imbestigasyon  sa pagsuta kun nganong nahiabot ang biktima sa maong lugar .

Gusto  usab  nga  masayran  sa kapolisan  kun  may  kauban  ba kini   sa dihang  gipusil   ang  biktima. Padayon  pa  karong  gipangita  sa kapolisan  ang  kriminal. (BANAT NEWS)