Kalangay paghatag sa sweldo sa JO sa Talisay gisusi sa mayor

CEBU, Philippines - Upat ka mga department heads sa dakbayan sa Talisay ang paesplikahon tungod sa giingong kanunay’ng pagkalangan sa mga sweldo sa mga job orders (JO) matag pay day.

Sa maong sitwasyon si Mayor Johnny De los Reyes ug ang city administrator nakadawat og mga pagsaway kabahin niini.

Ang memorandum numero 2013-005 gi-address ngadto kang human resource department head Hazel Bathan, city budget officer Edgar Mabunay, city accountant Viluzminda Villarante ug city treasurer Emma Macuto.

Sa milabay’ng semana si Erick Auza, Ad Hoc District Chairman sa Centrist Democratic Party of the Philippines ug presidente sa Sustainability Initiatives, Inc. mipadayag sa iyang pagkadismaya sa administrasyon ni De los Reyes.

Matud ni Auza nga ang kagamhanan sa siyudad wala makakita og daling paagi sa disbursement ug pag-release sa mga sweldo sa JO.

Sa letter complaint ni Auza nagkanayon kini nga ang mga JO mapugos sa paglinya diha sa huot nga hall way  sa city hall diin ang gitas-on sa linya maggikan diha sa taas paingon sa hagdan hangtud sa kinaubsang bahin sa building. Sa usa ka pahina nga memorandum si city administrator John Yre De los Reyes nagkanayon nga ang mga nahisgutang department head maoy responsable sa pagkalangan sa proseso sa payroll.

Matud ni Yre nga naglaom siyang ang  pagpanghatag sa sweldo sa mga kawani dili na kini malangan.

Matud usab ni Yre nga ang mga schedule sa payroll wala matarong og establisar sa mga department head nga hingtungdan.

Dugang niini gimandoan ni Yre ang nahisgutang upat ka mga department head nga ma-adjust ang payroll schedule nga matugma kini sa work schedule processing time tali sa cut-off ug issuance sa pay check. (BANAT NEWS)