15-anyos nga naglayas gidagit sa Taxi Driver

CEBU, Philippines - Usa ka menor nga dalagita giingong milayas kay gikasab-an sa inahan gidagit sa usa ka drayber sa taxi nga nagpailang pulis sa miaging gabii sa Banawa Autogas sa barangay Guadalupe sa dakbayan sa Sugbo.

Mibutyag ang biktima nga gituyok-tuyok siya sa drayber sa taxi sa ngit-ngit nga dalan hangtod nga naabot kini sa dalan Colon.

Ang maong sakyanan nagdala sa plaka nga GXJ-355 nga gipanag-iya sa Caraga Taxi. Matud pa sa maong menor nga misuway unta siya pag-text sa apohan niini apan gipugngan siya sa drayber ug gitiunan og kutsilyo.

Gihulagway sa maong menor nga tiguwang na ug opawon ug nagpailang pulis sa Guadalupe ang maong drayber.

Nakahigayon ang maong menor nga makaikyas tungod kay nangihi ang drayber sa taxi busa daling mikaratil ang maong menor ug nangayo og pakitabang sa mga tawo. Gidala ang biktima sa mga tawo sa Carbon Police Station ug daling miapas ang apohan sa biktima human masayod sa gidangatan sa iyang apo.

 Mitug-an ang apohan sa biktima nga migawas sa ilang balay ang iyang apo tungod kay gikasab-an sa iyang inahan. Padayon ang imbestigasyon sa mga kapolisan sa pagtino sa impormasyon nga gihatag sa maong menor de edad nga dalagita. (BANAT NEWS)