Anti-Jaywalking Ordinance sa Mandaue City gitun-ang i-implimentar

CEBU, Philippines - Gitun-an karon sa kadagkoan sa siyudad sa Mandaue ang pag-implimentar sa Anti-Jaywalking Ordinance nunot sa gipalambo na nga traffic light system sa mga intersection nga mga dalan niini.

Kini ang gipadayag ni Roger Paller, Public Information Officer (PIO) sa kagamhanan sa maong dakbayan nga nahinabi sa Banat Manobela kagahapon.

Matud pa niya nga sa dili pa mahingpit sa pagpatuman ang maong ordinansa dunay pagtuon nga himuon kung si kinsa ang mopatuman niini.

Dunay mga traffic enforcers nga motutok sa anti-jaywalking ordinance nga ang tumong mao ang pagdisiplina sa publiko sa paggamit sa kalsada aron malikay sa disgrasya.

Kun kahinumdoman si Konsehal Elstone Dabon  mipasaka sa iyang resulosyon nga nag-awhag sa mga sakop sa Traffic Enforcement Agency Mandaue (TEAM) sa pagpatuman sa dugay na nga giaprobahang ordinansa nga Anti-Jaywalking Ordinance sa dagkong kadalanan ug eskina sa siyudad.

Gipasabot niya sa iyang resolusyon nga ang giaprobahan nga ordinansa nagpabilin nga wala gyud ikapatuman hinungdan nga daghang nagpataka og labang sa mga tawo sa kadalanan.

Dugang pa sa resolusyon ni Dabon maoy iyang giawhag ang buhatan sa Department of Public Works and Highways (DPWH) nga kabutangan usab og traffic barriers ang dapit sa dalan M.C. Briones ug eskina sa dalan N.S. Cabahug sa  barangay Maguikay sa maong dakbayan alang sa paglikay sa mahitabong aksidente. (BANAT NEWS)