Dispatchers lisud puohon?

CEBU, Philippines - Lisod kaayo ang pagpuo niining mga dispatchers nga nagsilbi nga mga “extortionists” sa mga drayber sa PUJ kay bisan og kapila na sila madakpi apan dili motagam ug mobalik ra gihapon sa ilang panginabuhian.           

Kini maoy gibutyag ni PO3 Marlon Abella, ang usa sa mga polis nga gidestino sa Anti-Dispatching Team nga sakop sa Cebu City Police Office-Traffic Group, nga gikahinabi sa Banat Manobela.

Ang mga dispatchers sama kanila ni Ritchie Laspiñas ug Ceferino Mario nga anaa magbasi sa eskena D. Jakosalem ug Colon kilid sa University of the Visayas miangkon nga nabilanggo na sila paglapas sa City Ordinance 2108.

Ang maong ordinansa nagdili sa mga dispatchers ug watch-your-car-boys ug naglatid nga silotan og P3,000 ang mga madakpan. Dinhi sa dakbayan gibana-bana ni PO3 Abella nga mga 300 ka dispatchers ang nag-operate ug daghan kanila mga nakasuway na pagkabilanggo.          

Kini maoy rason nga ang mga drayber mahadlok niining mga dispatchers nga ang uban nabulit ang kalawasan sa mga patik. Ang uban hinoon sa mga madakpang dispatchers nagpahimulos sa kalugak sa balaud.

Kadtong madakpan sa kalapasan sa ordinansa ipaagi lang og “summary proceedings” nga nagpasabot nga buhian ra sila ug patubagon lang sa kaso nga gisang-at kanila sa kapolisan.

Matud ni PO3 Abella nga daghan sa mga dispatchers dili na mobalik sa hukmanan aron moatubang sa husay sa ilang kaso mao nga mapugos ang huwes sa pag-ipon sa ilang kaso sa gitawag og “archived cases” nga tagdon lang kun madakpan o mopatim-aw na ang akusado.                    

Si PO3 Edgar Baton misugyot nga ang maayong paagi mao nga ang mga madakpang dispatchers patrabahoon lang sa kagamhanan nga walay sweldo sama sa pagpanilhig kay sa pasakaan og kaso.

Gipasalig ni Vice Mayor Edgardo Labella nga tun-an nila pag-usab ang ordinansa aron hingpit kini nga makasulbad sa problema sa mga drayber kabahin sa dispatchers.

Apan si Mayor Michael Rama miingon nga angayan gyud nga ipatuman sa hingpit ang maong ordinansa ug pangdakpon ang malapason. Mitakda si Rama nga makigsulti niining maong isyu sa hepe sa kapolisan.

Apan matud ni Rama nga iapil niya sa tigum ang kadagkoan sa Department of Labor and Employment (DOLE) kay kining maong isyu naglambigit man og isyu sa pagpanarbaho.

Ang mga dispatchers nga nahinabi sa Banat Manobela miingon nga napugos sila niining maong matang sa pagpangwarta kay wala sila’y laing paagi sa pagpanginabuhi.

Ang mga dispatchers mokita og kapin sa P200 sa usa ka adlaw ug mas dako kun daghan ang mga pasahero. (BANAT NEWS)