Darrel Carumba adto ilubong sa Alcoy

CEBU, Philippines -  Adto ilubong si Darrel A. Carumba  sa  sam-ang  publiko  sa lungsod  sa Alcoy,  nga  maoy  lungsod  niyang  natawhan.

Gikan sa Saint Francis Funeral Homes sa dalan N. Bacalso, syudad  sa Sugbo, dad-an  siya  ngadto sa Alcoy  sa umaabot  nga Huwebes.

Si  Carumba namatay  sa  miaging  Martes  sa alas 4:00  sa hapon didto  sa Cebu City Medical Center (CCMC).

Kini  human  operahi  ang  iyang  ulo  gikan  blood clot nga resulta  sa pagsaka  sa iyang  dugo  niadtong  Martes sa alas 3:00  sa kaadlawon sa ilang  balay.

Matud pa  sa iyang  asawa  nga  nahiabot  si  Carumba  sa alas 12:00  pasado  sa gabii  gikan sa duty  niini  sa Bantay Radyo.

Namahulay  sila  nga wala na  kini  manihapon  kay  mikaon  na  kining daan   kuyog  sa mga  kauban  niya  sa trabaho una siya  mopauli  sa ilang  balay

Nianang  pagka-alas  3:00  sa kaadlawon,  nakamata  nga  puno  sa kabalaka  ang  iyang  asawa  gumikan  sa pag-alindasay  niini  pinaagi  sa pagpanglamba  sa iyang  mga  kamot nga wala  na sa iyang  buot. Namatikdan  usab  sa asawa  nga  minguhal  si Carumba  kun mosulti nga  nakapasamot sa  iyang  kabalaka.

Nanawag  ang  iyang  asawa  sa mga  silingan  ug  nagpatabang  nga  ikahatud  sa CCMC  si Carumba.

Alas  5:00  pasado  sa buntag,  nahiabot  sila  sa CCMC  ug  sukad niadtong  higayona  panagsa  na lang  mobuka  ang  mata  niini  ug  makig-estorya, ug dayon  matulog pagbalik.

Niadtong Lunes  sa alas 3:00  sa kahapunon,  gioperahan  ang  ulo  ni Carumba  aron kuhaon  ang  dugo  nga  mibagtok  sa usa  sa mga  ugat  niini.

Sa alas 4:00  sa hapon  nabugto  ang  kinabuhi  niini  ug  wala  na maulii  pa.

Si Carumba  may  gibilin  nga  upat ka anak  diin ang  kamaguwangan  11 pay edad.  

Si   Carumba    nagsugod sa Banat News sa tuig 2000  nga  nadestino  sa   Cebu City hall isip  usa  sa iyang  mga  beat,  nadestino  usab  siya  sa  mga rehiyonal nga buhatan sa kagamhanan ug hangtod nga nahimo niyang beat ang Cebu Provincial Police Office.

Si Carumba  una nga nag-alagad isip reporter sa  DYRB ubos sa kanhi pagdumala ni Emil Fortuna ug nabalhin isip news writer sa Channel 13 sa dakbayan sa Mandaue hangtod  nga  mibalhin  na  usab  siya  sa Bantay Radyo hangtud  sa katapusang  gutlo  sa iyang  kinabuhi.

Giila si Darrel nga matinud-anon , maayo  og  kinaiya, ug kugihan nga mohimo sa mga kaakohan sa iyang trabaho, mahigalaon ug dili usab magpaiwit sa paghimo og mga komedya sa pagpahugyaw og katawa sa panahon sa panagtapok sa iyang mga kauban sa trabaho. (BANAT NEWS)