Kanal sa Talisay gilimpyohan

CEBU, Philippines - Gilimpyohan  sa  Talisay City Engineering Office  ang   mga kanal sa siyudad aron malikayan ang grabeng baha ilabi na sa pagsige og uwan-uwan.

Si Talisay City Engineer Audie Bacasmas mibutyag nga gipatabang nila ang task force ubos sa buhatan sa mayor sa ilang  pagpanglimpiyo sa mga kanal.

Matud ni Bacasmas nga nabantayan nila nga ang kasagarang nakuha  nga  mga basura dili lang mga plastik  nga sudlanan sa baligya sa mga tindahan.

Lakip na  usab   ang mga buak  nga plastik  nga planggana ug uban pa nga maoy hinungdan sa pagkabarado sa kanal.

Giingong  adunay mga tawong walay mga disiplina sa kaugalingon diin ang ilang mga basura anha ipanglabay sa kanal.

Ang city engineer nagkanayon  nga ang mga kanal gipamutangan nila  og mga takub apan  mawagtang  kini ilabi na kung puthaw.

Usa sa problema sa Talisay mao  ang baha matag-mobundak  ang uwan  ug  adunay mga lugar nga mohubas dayon ang tubig ,apan adunay mga lugar  nga molanat pa og pila ka semana una mohubas ang tubig.

Kasagaran sa mga Talisaynon nangandoy nga maimplementar na unta sa siyudad ang proyekto niining master drainage plan nga gituohang maoy makasulbad sa problema sa baha. (/WC) (BANAT NEWS)