P41 milyones gahin para drainage sa Umapad

CEBU, Philippines - Masulbad na ang kanunay nga pagbaha sa panahon nga magbunok ang ulan sa sitio Batiller sa barangay Umapad, dakbayan sa Mandaue human  mahingpit ang  paggahin sa kagamhanan og P41 milyones alang sa pagpalawom sa kanal paingon ngadto sa dagat sa Mactan Channel.

Si Mayor Jonas Cortes  miingon nga dugay na nga  suliran sa mga molupyo sa sitio Batiller ang kanunay nga pagbaha sa maong dapit.

Kini  nagumikan  sa  kagamay  sa kanal  sa maong  dapit. Gipasabot ni Cortes nga ang maong dapit nga adunay 100 metros nga gilay-on  gigahinan og P20 milyones nga kantidad alang sa phase 1.

Ang pagtrabaho  niini  gitakda  nga pagasugdan human sa bidding.

Si Cortes miingon nga ang laing P21 milyones  maoy    isunod   nga  gahin alang sa phase 2 ug  sa hingpit  nga paghuman sa maong proyekto.

Dugang pa niya nga ubos sa giplano nga pagpalawom ug pagpadako sa kahimtang sa maong kanal, ilang gibutangan  og  dagko nga  imbornal nga  may 42 metros ang diametro .

Si Umapad Barangay Kapitan Nelson Rubio nga nahinabi sa Banat News miingon nga ubos sa plano sa pagpalambo sa maong kanal ilang gihimo ang pagbutang og manhole matag 10 metros nga gilay-on.

Gitataw niya nga ilang gituyo ang pagbutang sa maong  manhole  aron  mahimong  sayon  na lang sa paglimpiyo ug pagkuha sa mga sagbot nga makaingon sa pagbara sa tubig.

Si Umapad barangay konsehal  Helen Sungahid nga nahimong emotional sa iyang pamahayag miingon nga dugay na gayod nga panahon ang pag-antos  sa mga molupyo sa maong dapit.

Gitug-an niya nga gibati niya ang hilabihan nga kahinangop dihang ang kagamhanan sa maong dakbayan hingpit na nga mihatag og pagtagad sa maong kanal pinaagi sa paggahin niini og salapi. (/WC) (BANAT NEWS)