Mga mayor giawhag pag-rehistro sa ilang mga mananagat
CEBU, Philippines - Gimandoan sa League of Municipalities of the Philippines (LMP) ang mga mayor nga motabang sa pagpatuman sa pagpangrehistro sa mga mananagat sa tagsatagsa nila ka lugar.
Ang kamandoan nga gipirmahan ni LMP national president Donato Marcos gipang apod-apod atol sa tigum sa mga mayor sa Sugbo niadtong Biyernes diin gipahigayon usab ang eleksiyon.
Atol sa eleksiyon, si Tuburan Mayor Democrito Diamante Jr. ang napiling bag-ong pangulo sa LMP Cebu chapter hulip kang Dumanjug Mayor Nelson Garcia.
Ang Bureau of Fisheries and Aquatic Resources, kauban sa LMP ug League of Cities of the Philippines, ang nipatuman karon sa National Program for Municipal Fisherfolk Registration (FishR).
Nalambigit usab niini ang ubang ahensiya sama sa Department of Interior and Local Government, Department of Budget and Management, National Anti-Poverty Commission ug National Statistics Office.
Ang mayor sa lugar ang moaprobar sa aplikasyon sa usa ka mananagat aron siya marehistro.
Ang Republic Act 8550, nga gitawag usab og Fisheries Code of the Philippines, nagmando sa tanang syudad ug lungsod sa pagbaton og rehistro sa mga mananagat aron maoy basehan sa pagpatuman sa mga programa sa gobyerno alang kanila. (BANAT NEWS)
- Latest
