Pagputol na unya sa PDAF mga kaalyado ra sa president maoy mabulahan — Osmeña

CEBU, Philippines - Ang mga kongresista nga alyado sa Partido Liberal maoy makabentaha kun dayonon ang lakang nga dili na mogahin og Priority Development Assistance Fund (PDAF) ngadto sa mga kongresista.

Mao kini ang gitataw ni kanhi Kongresista Tomas Osmeña nga usa ka opisyal sa Partido Liberal agi og reaksyon sa lakang nga wagtangon na ang PDAF nga tag P70 milyones sa matag kongresista kada tuig.

Nagpasabot nga sa tulo ka tuig nga termino sa usa ka kongresista mokabat gyud og P210 milyones ang magahin kaniya nga magamit pagpatuman og mga proyekto sa tagsa-tagsa nila ka dapit.

Apan matud ni Osmeña nga makabentaha g’yud ang mga alyado sa Partido Liberal nga maoy partido ni Presidente Aquino kun dayonon ang pagwagtang sa PDAF kay makaduol man sila sa presidente ug makapangayo og budget.

Gihimong sanglitanan ni Osmeña si Kongresista Gwendolyn Garcia sa ikatulo nga distrito sa Sugbo nga dili gyud makapangayo og proyekto sa presidente kay sakop man siya sa lain nga partido.

Ang tinguha nga pagwagtang sa PDAF nagumikan sa wala maayo pagkagamit nga pundo sa ubang senador ug mga kongresista nga ang milyon-milyon ka pesos nga kantidad napunta lang sa bulsa sa mga bogus nga Non-Government Organization (NGO) nga iya ni Janet Lim-Napoles.

Ang mga senador adunay tag P200 milyones nga PDAF sa matag tuig. Gisusi karon ang report nga ang PDAF nga gitugyan kanila ni Senador Juan Ponce Enrile, Jinggoy Estrada ug Ramon “Bong” Revilla apil sa nakuhaan og dakung kantidad nga nabulsa ni Napoles.  (BANAT NEWS)