Fish vendors sa Mandaue di una pabayro’g abang

CEBU, Philippines - Gihatagan og usa ka bulan nga moratorium nga di pabayron og abang ang mga fish vendors sa Mandaue City Public Market tungod sa kamenus sa halin sa ilang isda bunga sa oil spill tungod sa pagkalunod sa MV Saint Thomas Aquinas sa Lawis Ledge sa dakbayan sa Talisay human sa pagbangga sa MV Sulpicio Express Siete niadtong Agosto 16 sa gabii niining tuiga.

Si Konsehal Jimmy Lumapas nga maoy chairman sa Committee on Agriculture, Market and Abattoir nangamahan sa ordinansa sa pagpatuman sa usa ka bulan nga moratorium.

Sa nasayran nga ang mga naninda og isda nga nag-ukopar og puwesto sa merkado publiko sa sitio Tribunal sa barangay Centro sa maong dakbayan dihang nahinabi sa Banat News miingon nga sukad nahitabo ang krisis ilang namatikdan ang hinay na kaayo ang halin sa ilang isda.

Si Zaly Naya nga usa sa mga nanindahay og isda sa maong merkado miingon nga sa tulo ka adlaw lang niyang pagpamaligya P200,000 ang alkansi niya sa pagsugod sa hulga sa oil spill. (BANAT NEWS)