Vintage bomb nakuykuyan sa Liloan

CEBU, Philippines - Nakuykoyan sa backhoe ang usa ka vintage bomb sa usa ka construction site sa  sitio Greenhills, barangay Poblacion sa lungsod sa Liloan sa alas 4:00 sa hapon sa miaging adlaw.

Si PO3 Jason Gayo sa Liloan Police Station nga nahinabi sa Banta News miingon nga ang operator sa backhoe mitawag sa ilang buhatan ug mipahibalo nga usa ka gidudahan nilang bomba ang ilang nakuykoyan sa tukoran nila og building.

Busa daling mitawag si PO3 Gayo sa Operations Branch sa Cebu Provincial Police Office aron sa pagkuha sa maong bomba ug gipahunong ang pagtrabaho sa maong construction site tungod kay peligrong aduna pay bomba nga posibleng maigo nila og moulbo.

Ang CPPO mipadala sa mga sakop sa bomb squad pinangulohan nila ni SPO1 Reynaldo Solante ug si PO3 Jupiter Almocera, ug didto nakuha ang usa ka gituohang 250 pounder nga drop bomb sa panahon sa ikaduhang kalibotanong gubat.

Ang bomba gisuwayan unta nga dad-on aron pabuthon kagahapon sa buntag didto sa Carmen Copper Corporation apan wala motugot ang maong minahan. (/EIM) (BANAT NEWS)