Krimen sa Talisay mikunhod sa Agosto

CEBU, Philippines - Ang mga krimen sa dakbayan sa Talisay mikunhod sa  buwan sa Agosto  itandi  sa buwan sa Hulyo niining tuiga, matud ni Superintendent Resty Santos, officer-in-charge sa Talisay City Police Station.

Si Santos nga nahinabi sa Banat News kagahapon nagkanayon nga niadtong buwan sa Hulyo mikabat sa 123 ang index crime apan niadtong buwan sa Agosto miubos kini ngadto sa 103.

Ang index crime gilangkuban  sa robbery, theft, physical injury, rape, carnapping, cattle rustling ug murder.

Gibutyag sa OIC nga niadtong buwan sa Hulyo mikabat sa 38 ang insidente sa  tulis apan miubos kini ngadto sa 18 sa buwan sa Agosto.

Matud ni Santos nga gilauman pa nila kini nga mokunhod tungod sa pagkasikop sa suspetsadong tulisan nga si Joshua Tabera kinsa giingong adunay mga  sakop   nga tulisan.

Ang siyudad   taas  og kaso sa theft   kay  sa  buwan sa Hulyo mikabat  kini sa 77,  ug sa buwan sa  Agosto, 75 o duha lang ang kunhod.

Giingong kasagaran sa theft mao ang kinawatay sa mga metro sa tubig.

Midugang  usab   ang  OIC  sa kapolisan  sa Talisay nga gipahibawo  na  niya  ang mga junk shop  sa  siyudad nga dili mopalit og mga kinawat nga metro sa tubig.

Niadtong buwan sa Hulyo ang kapolisan  adunay natala  nga duha ka kaso sa murder, samtang sa Agosto  duha  usab, apan matud ni Santos nga pulos  kini nangasulbad.

Ang kapolisan walay natalang kaso sa pagpanglugos sa  nahisgutang mga buwan ug walay natalang kawat sa mga kahayopan. (/WC) (BANAT NEWS)