2 ka tawo napusilan angol sa Danao

CEBU, Philippines - Naangol ang duha ka tawo nga gipamusil sa managlahing takna ug dapit sa dakbayan sa Danao sa miaging gabii.

Ang unang pagpamusil nga nahitabo ala 1:00 pasado   sa kaadlawon ang takna sa miaging Biyernes sa dalan P.G. Almendras sa barangay Poblacion sa maong dakbayan ug ang biktima mao si Jesereel Bayo, 20,  nga taga barangay Taytay sa maong dakbayan.

Si SPO2 Ildefonso Prosia sa kapolisan sa maong dakbayan nga nahinabi sa Banat News miingon nga ang biktima gikan pa nga mitambong og disco dihang kalit lang gipusil sa tulo ka wala hiilhing lalaki nga gikasugat niini.

Matud pa niya nga human sa maong pagpamusil dali nga miikyas  ang  mga  kriminal  nga ilang gituohan nga gikan usab sa disco nga gitambongan sa biktima.

Ang ikaduhang pagpamusil nahitabo   sa alas 3:00 sa  kaadlawon  sa maong  adlaw didto  sa  Villa Socoro sa barangay Poblacion   gihapon  sa maong  dakbayan.

Ang biktima mao si Joseph Nino Abarca, 25 , walay trabaho nga nagpuyo sa dalan Duterte sa barangay Suba sa mao gihapong dakbayan.

Miingon  si  Prosia  nga gikan pa nga nag-inom ang biktima kuyog sa mga  higala ug human sa ilang panag-inom namauli  ang  tagsa-tagsa  sa ilang  panimalay.

Apan  giingong  kalit  lang mitumaw ang usa ka wala hiilhing lalaki  nga  mipusil  sa biktima hinungdan naigo   ang  sampot  niini  Ang duha ka biktima sa pagpamusil unang gidala sa Danao Provincial Hospital apan human   matambali  gipamalhin   dayon  kini  ngadto sa Vicente Sotto Memorial Medical Center sa dakbayan sa Sugbo.

Padayon  pang  gipangita  sa kapolisan  ang  duha  ka  kriminal. (/WC) (BANAT NEWS)