Police COPS awardee sa Lapulapu na-stroke

CEBU, Philippines - Ang police awardee sa Country Outstanding Policemen in Service o COPS sa dakbayan sa Lapulapu giatake sa sakit sa kasingkasing didto sa kaulohan sa milabay’ng Domingo sa gabii.

Si SPO2 Rodito Viovicente sa Police Community Relations o PCR sa Lapulapu City Police Office modawat unta sa iyang award karong Biyernes sa Metrobank Foundation sa kaulohan.

Matud ni Sr. Supt. Louie Oppus nga nahinabi sa Banat News alas 9:00 sa milabay’ng gabii sa adlaw’ng Domingo milakaw si SPO2 Viovicente sa Kampo Krame aron sa pagkuha sa iyang unipormeng gipa-laundry, apan kalit kining natumba ug sa dihang mibarog kini natumba pag-usab hinungdan nga gidala kini sa ospital.

Gumikan sa kagrabe sa kahimtang ni SPO2 Viovicente gidala siya sa St. Lukes Medical Center ug nasulod sa ICU diin katunga sa lawas niini dili na makalihok.

Matud pa ni Mayor Paz Radaza iyang nasayran nga "Acute Schemic Stroke" diin adunay blood clot sa utok si Viovicente hinungdan nga iyang gipasusi ni Lapulapu City Police Director Sr. Supt. Rey Lyndon Lawas ngadto sa tambalanan kung unsay mga panginahanglan niini.

Dako og natampo si SPO2 Viovicente sa kapolisan sa dakbayan sa Lapulapu, usa siya sa mga mimugna sa Barangay Peacekeeping Action Team o BPAT, Student Police, Marine Sports and Boat Operators Inc., Scubasurero ug pakigsandurot sa komunidad diin siya aktibo.

Lakip sa mga kalampusan ni SPO2 Viovicente mao ang pagkapili niini sa Metrobank Foundation isip national awardee sa COPS gikan sa gatosan ka mga nominadong polis ug migawas nga ikaduha sa napulo ka mga awardees sunod sa policewoman sa Talisay City. (Bong Soriano/EIM)

Milugos sa uyab sa amigo gikombikto sa korte

Gikombikto sa korte ang usa ka lalaki nga milugos sa uyab sa iyahang amigo diha sa Barangay Poblacion 1, Carcar niadtong Hulyo 2010.

Si Bobby Manlangit, 27, gisentensyahan ni Regional Trial Court Branch 16 Judge Sylva Paderanga og Reclusion Perpetua o pagkapriso sulod sa traynta ka tuig.

Gimandoan siya sa pagbayad og P50,000 sa civil damages, P50,000 sa moral damages ug P25, 000 sa exemplary damages.

Ang  biktima ni Manlangit nga residente sa Basak Pardo, Cebu City mao mismo misaysay sa nahitabo ngadto sa korte.

Matud pa niya, miduaw siya sa balay sa iyang uyab sa maong barangay niadtong gabhiuna. Ang iyang uyab giingong nakig-inom sa igsuong mga lalaki ug sa suspek samtang siya nagduka nga nagpaabot.

Tungod kay mamalhin og laing imnanan ang grupo gikuyogan siya sa uyab sa kwarto niini aron didto pakatulgon. Apan nianang pagkakaadlawon nakamatikod siyang dunay mitupad sa iyang gihigdaan ug nagsige og panghikap ug sa pagtuong ang iyaha kining uyab iyaha ra kining gipasagdan.

Apan giingong kalit siyang gipaak sa gituohan niyang uyab diha na siya nagduda ug kalit nga gitukmod ang lalaki ug diha niya nahibaw-an nga si Manlangit diay kadto.

Sumala pa niya kalit siyang gitionan og kutsilyo sa suspek ug gihulgang patyon kung magsaba ug tungod sa kahadlok wala na siyay nahimo dihang gilugos siya sa suspek.

Human sa hitabo gibaharan siya pag-usab nga dili pasabaon aron dili siya patyon ug diretsong milayat sa bintana. Diha diha misinggit ang babaye pagpangayo og taban ug miresponde usab ang mga igsuon ug ginikanan sa iyang uyab nga maoy midala kaniya sa kapolisan.

Ang suspek nadakpan ra usab ug gipasakaan og kaso, walay tawong mitestigo pabor sa suspek hinungdan sa pagka-kombikto kaniya. (BANAT NEWS)