Samsam nanghinaot maremedyohan ang pork

CEBU, Philippines - Gipanghinaot ni  Kongresista Gerald Anthony “Samsam” Gullas Jr. nga  may remedyo  ang  nasudnong  kagamhanan  aron  pag-implementar  sa pork barrel  karong  giwagtang  na  sa  hingpit  ang  maong  pundo sa  mga  magbabalaod sa nasud.

Gusto  ni  Samsam    nga  ang nasudnon   nga kagamhanan   mao  nay modirekta  sa paghatag  sa mga proyekto   ngadto  sa lokal nga kagamhanan.

Giangkon ni Samsam nga daghan ang apektado sa pagkawagtang sa PDAF.

Midugang  siya nga  silang  mga  bag-o  pa  sa katungdanan  walay  ikapakita  nga  proyekto  ngadto  sa katawhan  tungod  kay  wala  naman  ang  PDAF.

Hinuon  matud ni Samsam nga kung pagbuot sa katawhan nga tangtangon ang PDAF tungod kay naabusohan  kini wala usab sila’y mahimo ug gawas niini kinahanglang mosunod usab sila sa mando sa presidente sa nasud.

“A Congressman especially a neophyte naa gyu’y dapat ipakita pero it is abused we can’t deny the fact….If   that the people want then we have to go for it….Kung mao nay sugo sa presidente alangan sundawo man ta mosunod gyud ta”, ni Samsam pa.

Miingon   si Samsam nga posibleng mawala na ang iyang medical assistance ug scholarship program ngadto sa mga kabus apan takus nga mga estudyante sa iyang distrito. (Brenda D. Batuto/WC)

Laing cybersex nabisto sa Cordova

Arestado ang magtiayon samtang giluwas sa kapolisan ang tulo nila ka mga anak nga dalagita human sa usa ka anti-cybersex raid kagahapon sa hapon diha sa sitio Bilatan, barangay Ibabao sa lungsod sa Cordova.

Ang mga bata nag-edad lang og 11, 12, ug 16, samtang mabdos usab ang inahan nga suspek nga gibanabanang nag-ead og 30 anyos samtang kapin sa 40-anyos ang bana sumala p ni Senior Insp. Ma. Theresa Macatangay, pangulo sa Regional Anti-Human Trafficking Task Fource (RATTF).

Ang mga pangalan sa mga suspek gitago tungod sa kasensitibo sa ilang krimeng nahimo.

Ang pagpangronda natigayon inabagan sa International Justice Mission, Department of Social Welfare and Development, Department of Justice, ug sa United States Department of Homeland Security.

Si RATFF Insp. Sheryl Bautista uban sa mga sakop armado og search warrant nga giisyu ni Judge Ramon Daomilas, Jr. sa Regional Trial Court Branch 11 nga gipagawas niadtong Martes dihang gironda ang panimalay.

“Nitimbre siya namo nga ongoing na ang act sa sulod, that the girls were about to do the act so we went inside,” matud pang Macatangay sa The Freeman/Banat News.

Wala hinuon maaktuhi nila ni Macatangay nga naghubo ang mga bata ug pahikap-hikapon sa ilang pribadong lawas, apan nabasahan nila sa chat logs sa computer ang mando sa langyaw nga kustomer sa pagbuhat niini atubangan sa webcam.+

“They were about to do the show, i-subject na unta sila sa exploitation like pahuboon sila and ipa-touch ilang genitals,” matud pang Macatangay.

Misuway unta pageskapo ang bana apan nadakpan gihapon kini. Samtang ang mga bata daling gidala sa DSWD.

Tulo ka semanang gi-surveillance sa kapolisan ang mga suspek una pa sila mikuha og warrant. Nasuta nga $100 dollars ang gitaon sa mga suspek kada customer nga ipaagi sa usa ka money transfer. (BANAT NEWS)