CEBU, Philippines - Ikalimang sentenarian sa Brgy. Talima, Isla sa Olango gihikayan ni Mayor Paz Radaza atol sa pagsaulog sa ika-100 nga kasuraman sa adlaw’ng natawhan niini kagahapon.
Si Flaviano Barong Ompad Sr. nga nagsaulog sa birthday personal nga giregalohan ni Mayor Radaza og cash gikan sa kaugalingong bulsa niini ug mga pagkaon nga gikan sa kahugpongan sa mga kababayen-an sa Barangay Gun-ob, Ibo ug Pajo.
Matud pa ni Mayor Radaza nga ikalima na nga sentenaryo si Flaviano nga iyang nahatagan og hikay sukad ang iyang kapikas nga si kanhi Cong. Arturo "Boy" Radaza ug siya mismo nga namayor, mihatag og pagtagad sa mga nagpangidaron og 100 ka tuig.
Matud pa ni Radaza nga iya pang gitun-an pag-ayo ang usa ka ordinansa nga maghatag og P100 mil ngadto sa mo-edad og 100 ka tuig. Kun kini kaaprobahan makadawat gihapon si Flaviano sa maong gahin. Si Lolo Flaviano sa iyang bahin mapasalamaton sa pamunoan ni Mayor Radaza nga mihatag og importansiya kaniya nga sulod sa dugay nga panahon wala niini matagamtami.
Si Lolo Flaviano nanghinaut nga madugangan pa og laing 100 ka tuig ang iyang kinahuhi diin bugtong pag-ampo ngadto sa kahitas-an ug paglikay sa mga pagkaon nga dili makaayo sa panglawas ang hinungdan sa iyang taas nga kinabuhi.
Giangkon ni Lolo Flaviano nga bisan pa sa iyang pangidaron mahigugma pa gihapon siya og usa ka babaye kay gani may hinigugma man siya karon nga 60 anyos ang edad.
Kini tungod kay matud pa ni lolo bunga kini sa iyang kanunay nga pagduyan-duyan sa punoan sa Kolo nga maoy saksi sa ilang gugma. Si Lolo Flaviano adunay 20 ka mga anak, 96 ka apo ug 216 ka apo sa tuhod ug sungay. Si Flaviano kanhi kapitan sa barangay sulod sa 23 ka tuig niadtong dekada 70 diin gipangga ug gitahod kini sa mga residente sa Barangay Talima, Isla sa Olango. (BANAT NEWS)