Inahan gipatay sa anak

CEBU, Philippines - Nagkadugo ug patay na dihang nakit-an sa iyang bana ang iyang asawa human gidunggab napulo ka higayon sa ilang anak nga giingong “drug addict” sa barangay Sto. Niño dakbayan sa Bogo sa alas 4:00 sa hapon sa miaging adlaw.

Ang biktima naila nga si Jocelyn Berenguel Soliva, 47, taga barangay Sto. Niño dakbayan sa Bogo. Samtang ang suspetsado naila sab nga si Roselo Berenguel Soliva, 21, anak sa biktima.

Base sa pamahayag ni PO3 Ryan Alarde dihang nahinabi sa Banat News nga dihang ilang gipangutana ang suspek miingon kini nga giyawyawan siya sa iyang inahan hinungdan nga iyang gidunggab.

“Sige lang kuno og yawyaw ang iyang mama nagni-latin maong iyang gidunggab,” asoy pa ni PO3 Alarde.

Matud ni PO3 Alarde nga gidunggab sa suspek ang inahan diha sa hawanan sa ilang balay ug pagkahuman giguroy tulo ka metros ug gipasok sa silong sa ilang balay.

Dugang ni Alarde nga ang mga silingan sa biktima nakadungog og syagit ug nakit-an na lang nila nga nilakaw ang suspetsado palayo sa ilang balay.

Dako na lang kahibulong sa bana sa biktima pag-abot niya sa ilang balay nga naputos sa dugo ang iyang asawa nga naghigda sa salog sulod sa ilang balay.

Nakuha sa kapolisan sa lugar ang dose ka pulgadas nga kutsilyo nga gidudahang maoy gigamit sa pagdunggab.

Ang suspek nadakpan sa hot pursuit operation diha sa barangay Gairan sa dakbayan sa Bogo sa alas-8 sa buntag kagahapon ug nakuhaan pag-usab og laing kutsilyo.

Subay sa post mortem examination nga gihimo ni Dr. Rene Galo Palay, health officer sa siyudad nga napulo ka samad dinunggaban ang naangkon sa biktima diha sa iyang ulo, nawong ug liog. (BANAT NEWS)