Hapon wa kabayad naghikog

CEBU, Philippines - Patay nang napalgan ang usa ka Hapon sud sa lawak sa hotel nga iyang gisak-an diha sa barangay Pajo sa dakbayan sa Lapulapu kagahapon sa buntag.

Ang biktima mao si Onaka Kazumaza, 41, residente sa Osaka, Japan kinsa napalgang patay na ug may hikot nga neck tie sa iyang liog nga gihikot didto sa gripo sa bathtub sa lawak.

Sa pasiunang imbestigasyon ni SPO1 Allan Pantaleon nasuta nga mga alas 9:00 kagahapon sa buntag usa sa mga room boys sa maong hotel ang nanuktok sa lawak nga giukopar ni Kazumaza apan wala kini motubag.

Gumikan niini giablihan sa mga room boys ang lawak ug nadiskobrehan nga wala na kini kinabuhi.

Hinuon walay foul play nga nakita ang kapulisan sa kamatayon ni Kazumaza tungod kay adunay suicide note nga nakita diha sa lawak niini uban sa mga personal niyang gamit.

Nasayran nga niadtong Agosto 27 mi-check in sa maong hotel si Kazumaza ug napupos na ang tagal sa pagpuyo niini sa maong hotel ug posibleng naproblema kini sa ibayad maong naghikog. (Bong Soriano/EIM)

18-anyos sa Hipodromo  namatay sa dengue–Ygoña

Usa ka 18-anyos nga lalaki nga taga Barangay Hipodromo maoy labing ulahi nga namatay sa dengue dinhi sa dakbayan sa Sugbo ug miabot na og upat ka kinabuhi nga nakalas nga parehong gipaak og lamok nga adunay dengue virus.

 Matud ni City Health Officer Stella Ygoña nga bisan og adunay upat ka tawo nga namatay sa dengue gikan sa Enero hangtud sa Agosto 31, apan minus gihapon ang maong gidaghanon kun itandi sa walo ka patay sa samang termino kaniadtong miaging tuig.

 Si Ygoña nagkanayon nga gikan kaniadtong Enero miabut og 1,569 ka tawo ang na-admit sa lainlaing ospital dinhi sa dakbayan sa Sugbo human makasinati og dengue virus, apan ubos gihapon ang maong gidaghanon kun itandi sa 2,559 kaniadtong miaging tuig.

 Ang statistics nga gipresentar ni Ygoña ngadto sa mga sakop sa media sa City Hall nagpakita nga adunay dinaghan nga kaso sa dengue sa pipila ka sitio sa barangay Guadalupe, Talamban, Tisa, Mabolo, Pardo, Dulho-Fatima, Basak-Pardo ug Kalunasan. Mahinangpon nga gipahibalo ni Ygoña nga adunay pito sa 80 ka barangay dinhi sa dakbayan nga walay bisan usa ka kaso sa dengue. Kini mao ang barangay Agsungot, Lusaran, Paril, Sinsin, Pung-ol Sibugay, Sudlon 2 ug Toong.

 Matud ni Ygoña nga kadtong mga barangay nga wala gayo’y mga kaso sa dengue hangtud sa Disyembre 31, irekomendar niya sa City Hall ug Department of Health (DOH) nga hatagan og pasidungog. (BANAT NEWS)