Anak ni Alcover ipatangtang sa voters list sa Sambag Uno
CEBU, Philippines - Human maaprobahi ang iyang application for transfer of registration sa Cebu City North Election Registration Board, si Lemar Alcover, anak ni Pastor “Jun†Alcover, representative sa Anad Party list, nag-atubang karun og exclusion case.
Niadtong Mayo 13 National Election, si Lemar nidagan pagkamayor sa lungsod sa Tabogon ilawom sa One Cebu Party apan napildi.
Niadtong Biyernes, si Rosa Cristy Quidlat pinaagi sa iyang abogadong si Julius Caesar Entise mipasaka og kasong civil batok kang Lemar sa Municipal Trial Court in Cities (MTCC), Cebu City.
Si Entise mitug-an sa Banat News nga si Lemar napakyas sa pagmatuod nga nakapuyo siya og unom ka bulan subay sa Commission on Election (COMELEC) Resolution No. 9716 o Rules and Regulations on the Resumption of the System of Continuing Registration of Voters.
Giapil sa gikasohan mao ang mga sakop sa Election Registration Board (ERB) nga sila si Atty. Marchel Sarno, Atty. Evangeline Abatayo ug Rhea Angtud tungod sa pag-aprubar nila sa transfer of registration ni Alcover.
Basi sa complaint nga gi-file ni Quidlat, residente sa P. del Rosario Extension, Sambag I, Cebu City nga duha ka buwan og 12 ka adlaw pa lang gikan sa Mayo 13, si Lemar ni-file na og application for transfer of registration gikan sa Tabogon nganha na sa Sambag I.
Matod niya nga ang application ni Lemar giaprobahan sa ERB bisan kun kwentahon sugod Hulyo 24, 2013 sa adlaw nga nag-aplay og transfer si Lemar hangtud sa Oktobre 28,2013 tulo lang kini ka buwan ug unom ka adlaw.
Tungod niini, si Quidlat mihangyo sa korte nga mandoan ang ERB nga tangtangon sa voters list sa Sambag Uno si Lemar alang sa October 28, 2013 SK-Barangay Elections. (BANAT NEWS)
- Latest
- Trending
