White Cane Safety Day gisalmotan sa mga buta

CEBU, Philippines - Dul-an sa 40 ka mga buta nga mga trainee sa Department of Social Welfare and Development (DSWD-7) pinaagi sa Area Vocational Rehabilitation Center (AVRC II) sa Labangon, dakbayan sa Sugbo  misalmot sa kasaulogan  sa White Cane Safety Day.

Si Kerwin Macopia tigpamaba  sa DSWD7 nagkanayon  sa  Banat News kagahapon nga ang White Cane Safety Day gisaulog matag tuig aron mapausbaw ug maprotektahan ang pisikal, moral ug mga buhilaman sa tanang Persons with Disabilities (PWD's).

Dugang pa ni Macopia nga kining maong selebrasyon gitumong  usab    sa  paghiusa  sa  mga  kasinatian  ug  kaalam   bahin  sa  kalisod nga nasinatian sa mga PWD's bahin  sa ilang  panlihuk-lihok  taliwala  sa  mga  maayo  ug   may  normal  nga  panglawas.

Gitug-an ni Macopia nga atol sa maong kalihokan mihatag og lecture sila si Joy C. Fedelis ug Chesa Romares nga gikan sa Resources for Blind Inc. kabahin sa Basic Sighted Techniques .

Mipasundayag usab og aktwal nga aktibidad bahin  sa hustong   paggamit   sa sungkod. Gisaysay ni Macopia nga ang ubang indibidwal nga dili mga buta nga  misalmot sa maong aktibidad gitaptapan ang ilang mga mata aron ila usab nga masinati kung unsa kalisod ang kahimtang sa usa ka buta.

Matud pa ni Macopia nga parte usab sa maong aktibidad ang pagbansay  bahin  sa pagsaka ug pagkanaog sa hagdanan. Gani  mipahigayon  usab  og  mall tour  sila aron ang 12 ka mga buta nga mga trainee mahatagan og oportunidad nga makasuroy sa Ayala Center Cebu nga anaa mahimutang sa Cebu Business Park sa dakbayan sa Sugbo.

Dugang pa ni Macopia nga sa sulod sa mall gihatagan ang mga trainee og kahigayunan nga mahinabi ang mga sales ladies ug mga kahera. (BANAT NEWS)