CEBU, Philippines - Mikabat sa P25 mil ang kuwarta nga natulis sa duha ka wala hiilhing lalaki gikan sa warehouse sa usa ka Korean National sa Pier 4 , eskina sa General Maxilom ug S. Osmeña Street, sa dakbayan sa Sugbo kagahapon sa ala 1:40 sa hapon.
Ang biktima mao si Emilyn Betor, 23, manager sa RMPP Warehouse nga gipanag-iya ni Young Sok Kim nga usa ka Koreano.
Matud pa ni PO3 Karl del Mar sa Theft and Robbery Section nga nahinabi sa Banat News nga ang RMPP Warehouse baligyaanan og mga sapatos nga gikan sa Korea pinaagi sa wholesale. Miingon si del Mar nga ang mga lalaki nagpakaaron–ingnon nga customer ug nangutana kun tagpila ang ilang baligya.
Apan pipila ka gutlo ang milabay usa sa mga tulisan nga nag-long sleeve og itom miguyod kang Betor padulong sa iyang opisina nga gitionan og armas de fuego.
Nakuha sa mga tulisan ang halin sa maong warehouse nga mokabat og P25 mil ug ang cell phone ni Betor.
Human madawat ang kuwarta daling miikyas ang duha ka mga tulisan sakay sa motorsiklo padulong sa dakbayan sa Mandaue. Padayon pa nga gipangita sa kapolisan ang maong mga tulisan. (BANAT NEWS)