Samsam nanghatag og bugas sa mga mananagat

CEBU, Philippines - Mikabat sa 215 ka mga pamilya sa mga mananagat sa barangay Cansojong  kansang  panginabuhi  apektado  sa oil spill  nakadawat og hinabang nga bugas gikan kang Kongresista Gerald Anthony “Samsam” Gullas Jr. niadtong Lunes.

Gawas sa bugas ang maong mga mananagat  nakadawat usab og P250 matag usa gikan ni Senador Alan Peter Cayetano.

Gibutyag ni Samsam nga nangayo siya og dugang hinabang  kang Senador Cayetano.

Matud  pa  ni  Samsam  nga  maayo  na lang  nga   magamit sa mga mananagat  para  ipalit  og  sud-an ug uban pang nag-una nilang panginahanglanon ang  cash  nga  ilang  nadawat.

Matud usab ni Samsam nga gawas  sa  taga  Cansojong,  laing 400  usab ka pamilya sa mga mananagat sa barangay Tanke  ug 160 sa barangay San Roque ang natunolan niya og mga bugas nga hinabang.

Gawas sa dakbayan sa Talisay si Samsam nagplano usab   nga  motabang sa mga pamilyang naapektohan  sa oil spill    gihapon  didto sa dakbayan sa Naga.

Gibutyag usab sa kongresista nga nagkaestorya na sila ni Mayor Valdemar Chiong sa Naga  bahin sa maong problema.

Si Chiong giingong mimando na sa City Social Welfare sa pagpaandam sa mga relief goods nga ipanghatag ngadto sa mga pamilyang apektado.

Si Samsam nagkanayon nga sulod niining semanaha gitakda   nga  mag-meeting   sila  ni Senador Cayetano alang sa planong pagtabang sa mga  barangay nga gipaubos sa state of calamity tungod sa oil spill. (BANAT NEWS)