Dul-an kwatro mil kilong samo gisakmit sa PENRO
CEBU, Philippines - Laing duha ka sakyanan nga may dalang samo o sea grass ang gisakmit sa Provincial Environmental and Natural Resources Office (PENRO) niadtong milabay’ng Domingo.
Nasakmit ang kapin sa 641 ka kilo nga samo nga gisakay og Isuzu Elf truck pasado alas 10 sa buntag diha sa Sitio Baybay sa Tambigon, San Remegio sa nag- roving nga task force nianang adlawa. Ang tag-iya sa maong sakyanan naila nga si Benjie Mancao.
Si PENRO task force leader Loy Madrigal nagkanayon nga gipalit ni Mancao ang maong mga “samo†ug dad-on unta sa storage area didto sa Kawit lungsod sa Medellin.
Matud pa ni Mancao nga 20 na ka tuig kini niyang negosyo apan wa pa siya badlonga.
Samtang pasado alas-3 sa hapon sa susamang adlaw laing sakyanan nga usa ka pick-up type multicab ang nasakmit usab sa PENRO task force tungod kay nagdala og kapin tulo ka libo ka kilong samo didto sa Sitio Dauis, Brgy. Punta sa mao gihapong lungsod. Ang mga tag-iya sa maong multicab mao ang magtiayon nga si Ramie ug Jenny Sante.
Mihangyo ang mga nangadakpan nga pabuhian na lang sila lakip na ang ilang mga sakyanan tungod aduna kini mga Mayor’s Permit apan si Madrigal miingon nga dili balido ang maong mga permit. “Not valid ang permits. Kahibaw na sila (mga mayor) nga naay ordinance ang province.
Gihatagan na man namo sila og kopya,†matud ni Madrigal tungod kay bawal ang pagpanguha og samo o kwapo (Sargassum Polycystum) ug uban pang matang sa seaweeds. Dunay multa nga P1000 kada kilo ang gimando sa ordinansa nga pabayran sa mga malapason. (/EIM) (BANAT NEWS)
- Latest
