BOC gilugwaya’g 6 ka buwan

CEBU, Philippines - Laing unom ka bulan ang gihatag nga lugway sa Cebu Port Authority (CPA) ngadto sa Bureau of Customs (BOC) Port of Cebu  alang  sa hingpit  nilang pagbiya   sa  giokupahang edipisyo sulod sa Cebu International Port (CIP).

Sa pakisusi sa Banat News sa buhatan ni Customs Cebu District Collector Edward dela Cuesta nasayran nga normal gihapon ang operasyon sa BOC bisan pa sa hulga sa CPA nga papahawaon  na  sila.

Gani  sayo  niini  mihulga  ang  CPA nga butangan  nila og mga container vans ang parking lot sa BOC aron mapugos   kini  sa  pagbiya  sa  maong  lugar.

Nasayran  nga mihatag og dugang unom ka bulan ang CPA isip  lugway  aron  nga makapangita  og  kabalhinan  ang  mga  puwesto  ang  BOC.

Nagpadayon  pa  karon  ang  deliberasyon sa  P800 mil matag bulan nga abang sa  lugar  nga  buot balhinan sa BOC.

Apan  hangtud  karon  wala  pa kaaprobahi   ang  budget  alang  niini  hinungdan nga nalangay ang pagbalhin sa mga kawani sa Customs.

Usa  sa  problema nga masinati sa BOC mao ang pagmontar sa computer system alang sa ilang operasyon   nga nagkinahanglan   og igong panahon   aron  kini   mainstalar.

Pipila sa mga empleyado sa BOC  naglaum pa gihapon nga mahibalik ra kanila ang daan ug kaugalingong buhatan sa Customs sa Plaza Independensiya  karong   wala na  kini gamita  sa kagamhanan  sa dakbayan  sa Sugbo.( /WC) (BANAT NEWS)