Crime Prevention Week gisaulog

CEBU, Philippines - Gisaulog sa mga sakop sa kapolisan ang ika-19 nga Crime Prevention Week karong semanaha.

Kadungan niini  gilusad   usab  ang Cebu City Police Office Junior Police.

Tumong sa maong programa nga matabangan ang mga tulonghaan aron makakat-on ang mga tinun-an sa Criminology ug mabansay sa nagkalain-laing aspeto sa pagpatuman sa balaod.

Gipirmahan na kagahapon ang Memorandum of Understanding (MOU)  sa mga opisyal sa  CCPO  ug sa University of the Visayas- Main Campus,  University of Cebu-Main Campus ug sa Salazar College of Sciences and Institute of Technology aron sa pagpatuman sa maong proyekto.

Ang maong pagpinirmahay gitambongan nila ni  Donald D. Narra, CSP, PhD, Dean, College of Criminal Justice Education, sa University of Visayas; Ms. Heronia Denampo Mata, Dean sa College of Criminal Justice Education, Salazar Colleges of Sciences and Institute of Technology and Mr. Edito T. Maribojoc, Faculty member, sa College of Criminal Justice Education, University of Cebu. (Bryner Diaz/WC)

 Wind turbine  itaod  sa atop sa Talisay City Hall

Itarok karong  adlawa sa  atop  sa city hall building  sa  dakbayan  sa Talisay  ang usa  ka  wind turbine  nga  mosukod  sa  gikusgon  sa hangin  alang  sa  padaganon  nga  energy program  sa  kagamhanan sa maong  dakbayan.

Si Mayor Johnny V. de los Reyes  mibutyag kagahapon  nga  ang  maong  kahimanan  gikinahanglan  kaayo aron  mopakusog  sa boltahi  sa elektrisidad  nga  gikinahanglan  sa dakbayan.

Matud  pa  niya  nga  usa  kini  ka ginama  sa nasud  sa  Belgium  aron gamiton  sa proyekto  nga  iya  sa Malacanang ubos  sa   Climate Change . Commission (CCC)  nga  gipangulohan  ni   President Simeon  Benigno  C. Aquino III. Ang  pamuno  nasud  mitudlo  kang kanhi  senador  Heherson T. Alvarez  isip  pangulo  sa  maong  buhatan.

 Matud  ni  Reyes   nga  ang  nahisgutang wind turbine  nga  gikan sa  Belgium  maoy  mosukod  sa gikusgon  sa hangin  nga  gikinahanglan  sa hingpit  nga  pagpaandar  sa  proyekto  ugma   damlag.  Pinaagi   sa  wind turbine  masukod  usab  kun unsang  matanga  sa ekipo ang  gamiton  sa  makina  nga  paandaron  sa  hangin  nga gamiton  alang  sa maong  proyekto. 

 Matud  pa  ni  Reyes  nga  sulod sa gidugayon  nga lima  ngadto  sa napulo  ka tuig, ang  gikusgon  sa  elektrisidad  nga  mugnaon  sa wind turbine igo  kaayo  nga  maka-supply  sa  dakbayan  busa   mopabahar  sa bayranan  sa kuryente  niini ngadto  sa zero.

Sa maong  paagi  matud pa  ni  Reyes  nga  dili  na  magsalig  ang  dakbayan sa Talisay  sa kuryente  nga gikan  sa Visayan Electric Company (Veco),   ug  ang  tanan  mahimo  na lang  tipik  sa kasaysayan. Sa  pagkakaron  si Reyes  nagkanayon  nga  magbayad  og  P3 milyones  ang  kagamhanan  sa Talisay  ngadto  sa  VECO matag  buwan. (/WC)   (BANAT NEWS)